ನ್ಯೂಸ್ ನಾಟೌಟ್ : ಹಾವು, ಹುಳ , ಚೇಳುಗಳನ್ನು ತಿನ್ನುವವರನ್ನು ನೋಡಿದ್ದೆವೆ. ಆದರೆ ಇಲ್ಲೊಬ್ಬ ವ್ಯಕ್ತಿ ಬರೋಬ್ಬರಿ 187 ನಾಣ್ಯಗಳನ್ನು ನುಂಗಿ ಸುದ್ದಿಯಾಗಿದ್ದಾನೆ.
ರಾಯಚೂರು ಜಿಲ್ಲೆ ಲಿಂಗಸುಗೂರ ತಾಲೂಕಿನ ಸಂತೆ ಕೆಲ್ಲೂರ ಗ್ರಾಮದ 54 ವರ್ಷದ ದ್ಯಾಮಪ್ಪ ಹರಿಜನ ಎಂಬುವವರು ರೂ.5 ಮುಖಬೆಲೆಯ 56 ನಾಣ್ಯ , 2 ರೂ. ಮೌಲ್ಯದ 51 ನಾಣ್ಯ ಹಾಗೂ 10 ರೂ. ಮುಖಬೆಲೆಯ 80 ನಾಣ್ಯಗಳನ್ನು ನುಂಗಿದ್ದಾನೆ. ವಿಷಯ ತಿಳಿದ ಕುಟುಂಬಸ್ಥರು ನ.25ರಂದು ಬಾಗಲಕೋಟೆಯ ಬಿವಿವಿ ಸಂಘದ ಕುಮಾರೇಶ್ವರ ಆಸ್ಪತ್ರೆಗೆ ಕರೆತಂದರು. ಕೂಡಲೆ ಪರಿಶೀಲಿಸಿದ ವೈದ್ಯರು ಎಕ್ಸ್-ರೇ ಮಾಡಿದಾಗ ಹೊಟ್ಟೆಯಲ್ಲಿ ನಾಣ್ಯಗಳು ಇರುವುದು ಖಚಿತವಾಗಿದೆ. ವೈದ್ಯರು ದ್ಯಾಮಪ್ಪನ ಜೀವಕ್ಕೆ ತುಂಬಾ ಅಪಾಯವಿದೆ ಎಂದು ತಿಳಿಸಿದ್ದರು. ಎಸ್.ನಿಜಲಿಂಗಪ್ಪ, ವೈದ್ಯಕೀಯ ಮಹಾವಿದ್ಯಾಲಯ ಮತ್ತು ಹಾನಗಲ್ ಕುಮಾರೇಶ್ವರ ಆಸ್ಪತ್ರೆಯ ಶಸ್ತ್ರಚಿಕಿತ್ಸಾ ವಿಭಾಗದ ತಜ್ಞ ವೈದ್ಯ ಡಾ.ಈಶ್ವರ ಕಲಬುರ್ಗಿ ಮತ್ತು ಡಾ.ಪ್ರಕಾಶ ಕಟ್ಟಿಮನಿ, ಅರವಳಿಕೆ ತಜ್ಞರಾದ ಡಾ. ಅರ್ಚನಾ ಮತ್ತು ಡಾ. ರೂಪಾ ಹುಲಕುಂದೆ ಅವರು ಯಶಸ್ವಿಯಾಗಿ ನಾಣಗಳನ್ನು ಹೊರತೆಗೆದಿದ್ದಾರೆ. ಸದ್ಯ ದ್ಯಾಮಪ್ಪ ಚೇತರಿಸಿಕೊಂಡಿದ್ದಾರೆ ಎಂದು ವೈದ್ಯರು ತಿಳಿಸಿದ್ದಾರೆ. ಯಾವ ಕಾರಣಕ್ಕೆ ನಾಣ್ಯವನ್ನು ನುಂಗಿದ್ದಾರೆ ಎಂಬ ಮಾಹಿತಿ ದೊರೆತಿಲ್ಲ. ಆತ್ಮ ಹತ್ಯೆ ಮಾಡುವ ಉದ್ದೇಶದಿಂದ ನಾಣ್ಯಗಳನ್ನು ನುಂಗಿರಬಹುದು ಎಂದು ದ್ಯಾಮಪ್ಪನ ಸಂಬಂಧಿಕರು ಹೇಳುತ್ತಿದ್ದಾರೆ.
>
