ನ್ಯೂಸ್ ನಾಟೌಟ್: ಭಾರತೀಯ ರಾಷ್ಟ್ರೀಯ ಕಾಂಗ್ರೆಸ್ನ 85ನೇ ಸಮಗ್ರ ಅಧಿವೇಶನ ಛತ್ತೀಸ್ಗಡದ ರಾಯಪುರದ ನವ ನಗರದಲ್ಲಿ ಫೆ. 24ರಿಂದ 26ರವರೆಗೆ ನಡೆಯಲಿದೆ ಎಂದು ಕೆಪಿಸಿಸಿ ವಕ್ತಾರ ಟಿ.ಎಂ ಶಹೀದ್ ತೆಕ್ಕಿಲ್ ತಿಳಿಸಿದ್ದಾರೆ.
ನವ ನಗರದಲ್ಲಿ ವಿಶೇಷವಾಗಿ ನಿರ್ಮಿಸಿದ ಸ್ವಾತಂತ್ರ್ಯ ಹೋರಾಟಗಾರ ವೀರ್ ನಾರಾಯಣ ಸಿಂಗ್ ನಗರದಲ್ಲಿಅಧಿವೇಶನ ನಡೆಯಲಿದ್ದು, ಮಧ್ಯಪ್ರದೇಶದ ಮಾಜಿ ಮುಖ್ಯಮಂತ್ರಿ ಹಾಗೂ ಸುದೀರ್ಘಕಾಲ ಎ.ಐ.ಸಿ.ಸಿ.ಯ ಖಜಾಂಚಿಯಾಗಿದ್ದ ಮೋತಿಲಾಲ್ ವೋರಾ ವೇದಿಕೆಯಲ್ಲಿ ಕಾರ್ಯಕ್ರಮ ಆಯೋಜಿಸಲಾಗಿದೆ. 25 ವರ್ಷದ ನಂತರ ಚುನಾಯಿತರಾದ ಎ.ಐ.ಸಿ.ಸಿಯ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಅವರ ನೇತೃತ್ವದಲ್ಲಿ ನಡೆಯುವ ಅಧಿವೇಶನ ಇದಾಗಿದೆ.
>
ಒಟ್ಟು 15 ಸಾವಿರ ಪ್ರತಿನಿಧಿಗಳು ಸಮ್ಮೇಳನದಲ್ಲಿ ಭಾಗವಹಿಸಲಿದ್ದು, ಇದರಲ್ಲಿ ಎಐಸಿಸಿಯ 1338 ಚುನಾಯಿತ ಸದಸ್ಯರು, 487 ಸಹ ಸದಸ್ಯರು, 9915 ಪ್ರದೇಶ ಕಾಂಗ್ರೆಸ್ ಸಮಿತಿಯ ಪ್ರತಿನಿಧಿಗಳು ಮತ್ತು 3 ಸಾವಿರ ಪಿ.ಸಿ.ಸಿ.ಯ ಸಹ ಸದಸ್ಯರು ಭಾಗವಹಿಸಲಿದ್ದಾರೆ. ಎಐಸಿಸಿ ಸದಸ್ಯರಲ್ಲಿ 704 ಸಾಮಾನ್ಯವರ್ಗ 228 ಅಲ್ಪಸಂಖ್ಯಾತರು, 381 ಒ.ಬಿ.ಸಿ, 192 ಪರಿಶಿಷ್ಟ ಜಾತಿ, 133 ಪರಿಶಿಷ್ಟ ಪಂಗಡದವರಿದ್ದಾರೆ. ಪ್ರತಿನಿಧಿಗಳಲ್ಲಿ 235 ಮಹಿಳೆಯರನ್ನು ಆಯ್ಕೆ ಮಾಡಲಾಗಿದೆ ಸಿ.ಡಬ್ಲು.ಸಿ ಗೆ 25 ಮಂದಿ ಸದಸ್ಯರನ್ನು ಆಯ್ಕೆಮಾಡಲಾಗುವುದು. ಚುನಾವಣೆ ನಡೆದರೆ 12 ಜನರು ಕಾಂಗ್ರೆಸ್ ವರ್ಕಿಂಗ್ ಕಮಿಟಿ ಸದಸ್ಯರನ್ನು ಎಐಸಿಸಿ ಸದಸ್ಯರು ಮತ ನೀಡಿ ಚುನಾಯಿಸುತ್ತಾರೆ. ಕಾಂಗ್ರೆಸ್ ಅಧ್ಯಕ್ಷರು ಮತ್ತು ಕಾಂಗ್ರೆಸ್ ಪಾರ್ಲಿಮೆಂಟ್ ಪಾರ್ಟಿ ನಾಯಕರು ಪಕ್ಷದ ಸಂವಿಧಾನದ ಪ್ರಕಾರ ಸಿ ಡಬ್ಲ್ಯುಸಿಗೆ ಸದಸ್ಯರಾಗುತ್ತಾರೆ. ಉಳಿದ 11 ಮಂದಿ ಸದಸ್ಯರನ್ನು ಕಾಂಗ್ರೆಸ್ ಅಧ್ಯಕ್ಷರು ನಾಮನಿರ್ದೇಶನ ಗೊಳಿಸುವರು. ಈ ಸಮ್ಮೇಳನ 2023ರ ಕರ್ನಾಟಕ ವಿಧಾನ ಸಭಾ ಚುನಾವಣೆ ಮತ್ತು 2024ರ ಲೋಕಸಭಾ ಚುನಾವಣೆಗೆ ದಿಕ್ಸೂಚಿಯಾಗಿದೆ.
ಸಮ್ಮೇಳನದಲ್ಲಿ ರಾಜಕೀಯ, ಆರ್ಥಿಕ, ಅಂತಾರಾಷ್ಟ್ರೀಯ, ರೈತ ಮತ್ತು ಕೃಷಿ, ಸಾಮಾಜಿಕ ನ್ಯಾಯ ಮತ್ತು ಯುವಜನ ಸಬಲೀಕರಣ, ಶಿಕ್ಷಣ ಮತ್ತು ಉದ್ಯೋಗ ಬಗ್ಗೆ ನಿರ್ಣಯಗಳನ್ನು ತೆಗೆದುಕೊಳ್ಳಲಾಗುವುದು. ಇದರಲ್ಲಿ 6 ಪ್ರಮುಖ ನಿರ್ಣಯಗಳಾಗಿವೆ ಎಂದು ಕೆ.ಪಿ.ಸಿ.ಸಿ ವಕ್ತಾರ ಟಿ.ಎಂ ಶಹೀದ್ ತೆಕ್ಕಿಲ್ ತಿಳಿಸಿದರು.
