ನ್ಯೂಸ್ ನಾಟೌಟ್: ಕಲಿಯುಗದಲ್ಲಿ ಭಗವನ್ನಾಮ ಸ್ಮರಣೆ, ಭಜನೆ ಮಾಡುವುದರೊಂದಿಗೆ ಪ್ರತಿಯೊಬ್ಬರೂ ಜೀವನವನ್ನು ಸಾರ್ಥಕಪಡಿಸಿಕೊಳ್ಳಬೇಕಾಗಿದೆ ಎಂದು ಮಾಣಿಲ ಶ್ರೀಧಾಮದ ಪರಮಹಂಸ ಶ್ರೀ ಮೋಹನದಾಸ ಸ್ವಾಮೀಜಿ ಹೇಳಿದರು. ಅಮ್ಮ ಕಲಾವಿದರು ಬಹರೈನ್ ಆಯೋಜನೆಯಲ್ಲಿ ಮನಾಮದ ನೂತನ ಕನ್ನಡ ಭವನ ಸಭಾಂಗಣದಲ್ಲಿ ಇತ್ತೀಚೆಗೆ ಕನ್ನಡ ಸಂಘ ಬಹರೈನ್ ಆಶ್ರಯದಲ್ಲಿ ವೇದಮೂರ್ತಿ ಕಿಳಿಂಗಾರು ಕುಮಾರ ಸುಬ್ರಮಣ್ಯ ಭಟ್ ಪೌರೋಹಿತ್ಯದಲ್ಲಿ ಆಯೋಜಿಸಿದ ಸತ್ಯನಾರಾಯಣ ಪೂಜಾ ಕಾರ್ಯಕ್ರಮದಲ್ಲಿ ಆಶೀರ್ವಚನ ನೀಡಿದರು.
ಕಾರ್ಯಕ್ರಮದಲ್ಲಿ ವಿಶೇಷ ಆಕರ್ಷಣೆಯಾಗಿ ಖ್ಯಾತ ಸ್ಯಾಕ್ಸೋಫೋನ್ ವಾದಕ ಕರ್ನಾಟಕ ಕಲಾಶ್ರೀ, ನಾದ ವಿಶಾರದ ಡಾ.ಪಿ.ಕೆ.ದಾಮೋದರ್, ಬಾಲ ಪ್ರತಿಭೆ ಮಾ.ಚಿಂತನ್ ಪುರುಷೋತ್ತಮ್ ಸ್ಯಾಕ್ಸೋಫೋನ್ ವಾದನ ನಡೆಸಿಕೊಟ್ಟರು. ತವಿಲ್ ನಲ್ಲಿ ಮನುರಾಜ್ ಬಿ., ತಬಲಾದಲ್ಲಿ ಪ್ರವೀಣ್ ಜೋಗಿ ಸಾಥ್ ನೀಡಿದರು. ಅಲ್ಲದೆ ಸ್ಥಳೀಯ ನೂರಾರು ಮಕ್ಕಳು, ಮಹಿಳೆಯರು, ಪುರುಷರ ತಂಡಗಳಿಂದ ಕುಣಿತ ಭಜನೆ ನಡೆಯಿತು.
>
ಕಾರ್ಯಕ್ರಮದಲ್ಲಿ ಅನ್ನದಾನದ ಪ್ರಾಯೋಜಕ ಸುಭಾಶ್ಚಂದ್ರ ಅವರನ್ನು ಶಾಲು ಹೊದಿಸಿ ಸನ್ಮಾನಿಸಲಾಯಿತು. ಕನ್ನಡ ಸಂಘದ ಅಧ್ಯಕ್ಷ ಪ್ರದೀಪ್ ಶೆಟ್ಟಿ, ರಾಜ್ಯಪ್ರಶಸ್ತಿ ವಿಜೇತ ಕನ್ನಡಿಗ ರಾಜ್ ಕುಮಾರ್, ಹಿರಿಯ ಕನ್ನಡಿಗ ಅಮರನಾಥ್ ರೈ, ನಾದವಿಶಾರದ ಡಾ.ಪಿ.ಕೆ.ದಾಮೋದರ್ ಮತ್ತು ಬಳಗ, ಪುರೋಹಿತ ಕುಮಾರ ಸುಬ್ರಮಣ್ಯ ಕಿಳಿಂಗಾರು ನಡುಮನೆ, ತಾಯ್ನಾಡ ಅತಿಥಿಗಳಾದ ಆನಂದ ಶೆಟ್ಟಿ ತಾಳಿಪಡ್ಪು, ರಾಜೇಶ್ ಹಾಗೂ ಕುಣಿತ ಭಜನಾ ತಂಡದ ತರಬೇತುದಾರರಾದ ಹರಿಣಿ ಉತ್ಕರ್ಷ್ ಶೆಟ್ಟಿ, ನಮಿತಾ ಸಾಲ್ಯಾನ್, ಯಕ್ಷಿತ್ ಶೆಟ್ಟಿ, ಜೀವಿತ್ ಪೂಂಜಾ ಅವರನ್ನು ಸ್ವಾಮೀಜಿಯವರು ಶಾಲು ಹೊದೆಸಿ, ಸ್ಮರಣಿಕೆ, ಮಂತ್ರಾಕ್ಷತೆಯೊಂದಿಗೆ ಅನುಗ್ರಹಿಸಿದರು. ಸತ್ಯನಾರಾಯಣ ಪೂಜೆಯ ಪರಿಚಾರಕರಾಗಿ ಗಣೇಶ್ ಭಟ್, ಹರಿನಾರಾಯಣ ಭಟ್ ಮತ್ತು ರಾಮ್ ಪ್ರಸಾದ್ ಅಮ್ಮೆನಡ್ಕ ಸಹಕರಿಸಿದರು. ಸಾವಿರಾರು ಭಕ್ತರು ಪಾಲ್ಗೊಂಡಿದ್ದರು.
ಕನ್ನಡ ಸಂಘದ ವತಿಯಿಂದ ಅಧ್ಯಕ್ಷ ಪ್ರದೀಪ್ ಶೆಟ್ಟಿಯವರು ಪೂಜ್ಯ ಸ್ವಾಮೀಜಿ ಹಾಗೂ ಇತರರನ್ನು ಗೌರವಿಸಿದರು. ದ್ವೀಪದ ಕಲಾಸಂಘಟಕ ಮೋಹನದಾಸ್ ರೈ ಎರುಂಬು ಅವರ ಸಾರಥ್ಯದ ಅಮ್ಮ ಕಲಾವಿದರು ಬಹರೈನ್ ವತಿಯಿಂದ ನಡೆದ ಕಾರ್ಯಕ್ರಮ ನೂರಾರು ಸ್ವಯಂಸೇವಕರ ಶ್ರಮ, ಬದ್ದತೆ, ಭಕ್ತಿಯಿಂದ ಯಶಸ್ವಿಯಾಯಿತು.
